Washington, Marekani – Julai 2025
Katika hatua iliyozua gumzo kubwa katika medani ya siasa za Marekani, bilionea wa teknolojia Elon Musk ametangaza rasmi kuanzisha chama kipya cha kisiasa kiitwacho America Party, akieleza kuwa lengo lake ni “kurejesha demokrasia ya kweli” nchini humo.
Tangazo hilo limetolewa kupitia mtandao wa kijamii wa X, unaomilikiwa na Musk, kufuatia kura ya mtandaoni aliyoendesha kwa wafuasi wake ambapo zaidi ya asilimia 65 walionyesha kuunga mkono wazo la kuwa na chama kipya. “Wamarekani wamechoshwa na mfumo wa sasa unaodhibitiwa na chama kimoja kisiasa. America Party ni jukwaa jipya kwa sauti zilizotengwa,” alisema Musk.
Hapo awali, Elon Musk alikuwa mshirika wa karibu wa Rais wa zamani Donald Trump, akihudumu kama Mshauri Maalum wa Rais na Mkuu wa Idara ya Ufanisi Serikalini (DOGE). Hata hivyo, mahusiano kati yao yalivunjika baada ya Trump kuwasilisha muswada uliopinga magari ya umeme kwa kuondoa misamaha ya kodi, jambo lililokuwa tishio kwa biashara ya magari ya Tesla inayomilikiwa na Musk.
Kwa mujibu wa Musk, hatua hiyo ilikuwa “kikwazo kwa maendeleo ya teknolojia safi na mzigo mkubwa kwa bajeti ya taifa,” kinyume kabisa na malengo ya idara aliyokuwa akiiongoza. Mvutano kati ya wawili hao ulizidi baada ya Trump kufuta uteuzi wa Jared Isaacman—rafiki wa karibu wa Musk—kama Mkurugenzi wa NASA, akimtuhumu kwa ukaribu wake na chama cha Democrats.
Tofauti zao ziliendelea hadharani, huku wakirushiana maneno makali kwenye mitandao ya kijamii. Trump alimuita Musk “mwendawazimu,” naye Musk akamjibu kwa kumwita “asiye na shukrani,” akidai kwamba Trump hangeshinda uchaguzi wa 2024 bila msaada wake wa kifedha wa dola milioni 288.
Uzinduzi wa America Party unaashiria kuanza kwa sura mpya ya kisiasa nchini Marekani, huku wachambuzi wakitabiri kuwa chama hicho kinaweza kuvuruga mizani ya kisiasa iliyozoeleka kati ya Republican na Democrat, hasa kuelekea uchaguzi mkuu ujao.
Comments