MASHAHIDI WAKWAMISHA KESI YA PONDA LEO

 Katibu Mkuu  wa  Jumuiya na Taasisi za Kiislamu nchini, Sheikh Ponda Issa Ponda akiingia katika chumba cha Mahakama ya Hakimu Mkazi Kisutu jijini Dar es Salaam leo pamoja na washtakiwa wenzake 49, hata hivyo kesi hiyo imeahirishwa kutokana na mashahidi upande wa mashtaka kutofika mahakamani hapo. (Picha na Habari Mseto Blog)

Katibu Mkuu  wa  Jumuiya na Taasisi za Kiislamu nchini, Sheikh Ponda Issa Ponda akiwa na mshtakiwa mwenzake,  Mukadam Abdal Swalehe (kushoto)

 Baadhi ya wafuasi wa Sheikh Ponda wakiwa katika viunga vya mahakama ya Kisutu

Katibu Mkuu  wa  Jumuiya na Taasisi za Kiislamu nchini, Sheikh Ponda Issa Ponda na mshtakiwa mwenzake Mukadam Abdal Swalehe wakitoka mahakamani chini ya ulinzi wa askari magereza.

 Ulinzi uliimarishwa katika eneo la Mahakama ya Kisutu leo.

 Katibu Mkuu  wa  Jumuiya na Taasisi za Kiislamu nchini, Sheikh Ponda Issa Ponda (kulia) akiwa na washtakiwa wenzake. 

Na Dotto Mwaibale
KESI inayomkabili Shekhe Ponda na wenzake imeshindwa kuendelea kusikilizwa baada ya mashahidi kadhaa kushindwa kufika Mahakama ya Hakimu Mkadhi ya Kisutu Dar es Salaam jana.
Akihairisha kesi hiyo Hakimu wa Mahakama hiyo Victoria Nongwa alisema itarudi Januari 14 mwaka huu na kwa kuwa dhamana ya Shekhe Ponda na Mukadam imezuiliwa na DPP , kesi hiyo itaendelea kusikilizwa Januari 17.
Katika hatua nyingine upande  wa Utetezi katika kesi ya uchochezi na wizi wa mali zenye thamani ya Sh milioni 59 umeandika barua kwa Mkurugenzi wa Mashitaka (DPP) kulalamikia kitendo cha kuwanyima dhamana viongozi wa Jumuiya na Taasisi za Kiislamu, Shekhe Issa Ponda na Mukadam Swalehe.
Wakili wa walalamikiwa hao Juma Nassoro alidai hayo jana wakati akizungumza na waandishi wa habari nje ya Mahakama ya Hakimu Mkazi Kisutu baada ya kesi hiyo inayowakabili viongozi hao na wafuasi 48 kuahirishwa.
Alisema wamewasilisha  barua yenye kumbukumbu namba RJ/CC/245/2012 Desemba 24 mwaka jana kulalamikia kitendo cha DPP kuwanyima dhamana Shekhe Ponda na Mukadam kwa kuwa mashitaka yanayowakabili yanafanana na yanayowakabili washitakiwa wenzao.
Nassoro alidai kuwa, kwa mujibu wa  ushahidi uliotolewa mahakamani hapo na upande wa mashitaka mpaka sasa hakuna shahidi hata mmoja ambaye ameeleza kuwa washitakiwa hao walisababisha uvunjifu wa amani.
Hata hivyo Mahakama imetoa hati ya kukamtwa kwa shahidi wa upande wa mshitaka kwa kosa la kuidharau Mahakama kwa kutofika kutoa ushahidi mahakama hapo bila taarifa yoyote.
Awali Wakili wa Serikali Tumaini Kweka aliomba ahirisho fupi kwa kuwa mashahidi waliotakiwa kutoa ushahidi jana hawakufika mahakamani na kuongeza kuwa shahidi mmoja anaumwa mwingine amesafiri lakini watatu alipokea hati ya kuitwa mahakamani akasaini lakini hajafika bila kutoa taarifa.
Hakimu Victoria Nongwa alisema ameona hati ya kuitwa mahakamani iliyosainiwa na shahidi huyo hivyo mahakama imetoa hati ya kukamatwa kwa shahidi huyo ambaye Wakili Kweka hakutaka kumtaja kwasababu za kiusalama.
Wakili Nassoro alidai kuwa hiyo siyo sahihi na ni ngumu kuamini kwasababu mwanzo walidai wana mashahidi zaidi ya 40 kwanini kama hao hawajapatikana wasilete mashahidi wengine pia alilalamikia kitendo cha Wakili huyo kutotaja majina ya mashahidi.
Shekhe Ponda na wenzake 49 wanakabiliwa na mashitaka matano ambapo Oktoba 12 mwaka huu, katika eneo la Chang’ombe Markazi  washitakiwa walipanga njama za kuingia kwenye kiwanja kinachomilikiwa kampuni ya AgriTanzania  Ltd  kwa nia ya kujimilikisha  kiwanja hicho isivyo halali.
Inadaiwa kati ya Oktoba 12 na 16 mwaka huu huko Chang’ombe  Markazi  pasipo na uhalali, washitakiwa wote  katika hali  iliyokuwa ikipelekea  uvunjifu wa amani  waliingia na kujimilikisha  kwa nguvu ardhi  ya  kampuni hiyo na kuiba  mali zenye thamanai ya Sh milioni 59.7.
Katika shitaka la uchochezi linalowakabili Shekhe Ponda na Swalehe, inadaiwa katika eneo hilo la Chang’ombe Markazi  kwa maelezo kuwa wao ni viongozi wa Jumuiya na Taasisi za Kiislamu waliwashawishi  wafuasi wake ambao ni washitakiwa hao  kutenda makosa hayo kinyume cha sheria.